උපුටා ගැනීම (බුදුසරණ 2010.01.07)
ලොවුතුරා දහම තුළින් අප සසර ගමන කෙටි කර ගැනීමට ලැබෙන ශක්තිය අප්‍රමාණ ය. අප කාගේත් දිවි පවත්නා කාලය ඉතා අල්ප ය. ඒ අල්ප දිවියෙන් පිනට දහමට යොමු කෙරෙන කාලය බොහෝ සෙයින් ඊටත් වඩා අල්ප ය. ගෙවී ගෙන යන කාලය පිළිබඳව සිතා බලන හැම විට අතීත ආවර්ජනයේදී සතුටුවීමට හැකි අතීතයක් තිබේ ද?. නොමැති නම් අනාගත කාලය සුචරිත දහමින් ආලෝකවත් කර ගන්නට වර්තමානය පිරිසුදු පිවිතුරු කර ගත යුතු කාලය එළඹී ඇත.
නමෝ තස්ස භගවතෝ අරහතෝ
සම්මා සම්බුද්ධස්ස
‘’චත්තාරිමානි භික්ඛවේ සගහවත්ථුනි කතමානි චත්තාරි දානං, පෙය්‍යවජ්ජං, අත්ථචරියා සමානත්තතා ඉමානි ඛො භික්ඛවේ චත්තාරි සංග්‍රහ වත්ථුනීති’
තථාගත ලොව්තුරා බුදුරජාණන් වහන්සේ ලොවට වැඩ පිණිස දේශනාකොට වදාළ කරුණු හතරක් ඉහත සූත්‍ර පාඨයට ඇතුළත් වේ. එනම් දානය, පි‍්‍රය වචනය, අර්ථය පිණිස කටයුතු කිරීම, සමානාත්මතාව - දුක සැප සමව බෙදාගෙන ජීවත්වීම යන ඒ සතර කරුණුය.
මෙ කරුණු හතර මිනිස් වර්ගයා තුළ දියුණුකර ගැනීමෙන් සිදුවන යහපත විමසා බලමු. නව වර්ෂයකට පියමං කරන අප විසින් ගෙවී ගිය කාලයට වඩා එළඹෙන කාලය යහපත් කර ගැනීමට මෙම කරුණු සතර දියුණු කිරීම සඳහා අධිෂ්ඨාන කළ යුතුව ඇත.
සුගත තථාගත ලොව්තුරා බුදුරජාණන් වහන්සේගේ නිර්මල සම්බුදු සසුන අපට දායාද වූයේ සංසාරගත මහානුභාව සම්පන්න කුසල ශක්තිය නිසා බැව් අප නිතර සිහි කටයුතුය. ලොවුතුරා දහම තුළින් අප සසර ගමන කෙටි කර ගැනීමට ලැබෙන ශක්තිය අප්‍රමාණය. අප කාගේත් දිවි පවත්නා කාලය ඉතා අල්පය. ඒ අල්ප දිවියෙන් පිනට දහමට යොමු කෙරෙන කාලය බොහෝ සෙයින් ඊටත් වඩා අල්ප ය.
ගෙවී ගෙන යන කාලය පිළිබඳව සිතා බලන හැම විට අතීත ආවර්ජනයේදී සතුටුවීමට හැකි අතීතයක් තිබේ ද?. නොමැති නම් අනාගත කාලය සුචරිත දහමින් ආලෝකවත් කර ගන්නට වර්තමානය පිරිසුදු පිවිතුරු කර ගත යුතු කාලය එළඹී ඇත.
මන්ද යත් වසරක් නිමා වී නව වර්ෂයකට පා තබන මොහොතේ අප ජීවිත සමාපත්තියට යොමුවිය යුතුය. ගතකළ ජීවිතය පිළිබඳව ආපසු හැරී බැලිය යුතුය. අප කාගේත් යම්යම් මතකයේ පවතින විශේෂ දිනයන් අනුස්මරණය කරනු ලැබේ. එනම් ජන්ම දින විවාහ පත් වූ දින ආදී වශයෙනි. එම දිනයන් ඇතැම්විට අනුස්මරණය කිරීම යථාර්ථයෙන් තොරව ඇතැම් අයකු සිදු කරනු දැකිය හැකිවේ. සමහර කුඩා දරුවන්ගේ ජන්ම දින සමරන ඇතැම් මව්පියන්ගේ බහුරු කෝලන් හා වැරැදි ආදර්ශ දෙන අවස්ථා ගැන දක්නට ලැබේ. මවුපියවරුන් ඥාතීන් හිතවතුන් ඒකරාශිකර විවිධ සාද පවත්වා ආශිර්වාදයන් හෝ සුබ පැතීමක් අපේක්ෂා කැරේ.
එම නිසා යම් යම් විශේෂ සන්ධි ස්ථානයන් සිහි කරන මොහොතේ ලොව්තුරා දහම මුසුව ඒ දිනයන් සැමරීම තුළින් මහත් ලෝක ශාන්තියක් ඉටුවන්නේ ය. එම නිසා මේ එළඹෙන වර්ෂය නව සුබ වර්ෂයක් කර ගැනීමට අප හැම අධිෂ්ඨාන කර ගන්නවා නම් වියයුත්තේ ගතකළ වර්ෂය තුළ අප සිත, කය, වචනය යන තිදොරින් සිදු වී ඇති අඩුපාඩු , හොඳ නරක දෑ පිළිබඳව ආවර්ජනා කිරීමයි. නොදැන හෝ සිදු වී ඇති කාය දුශ්චරිතාදී අකුසලයන් නැවත මේ වර්ෂය තුළත් ඉදිරියටත් නොවීමට අදිටන් කර ගැනීමයි.
සිදු කොට ඇති මව්පිය උපස්ථානාදී කුසල ධර්මයන් නැවත නැවතත් තම දිවිය සාර්ථක කරගන්නට රත්නත්‍රයේ ආශිර්වාද ලබා ගැනීමය. එම නිසා නූපන් අකුසල් නූපදවා ගැනීමට අධිෂ්ඨාන කළ යුතුය. උපන් කුසල් වැඩිදියුණු කර ගැනීමට අදිටන් කළ යුතුය.
තිදොරේ සංවරය ඇතිකරලමින් සදාචාර සම්පන්න ඇවතුම්, පැවතුම් ඇති ගුණ ගරුක දිවියක් ගෙවීමට අධිෂ්ඨාන කරගත යුතු කාලයත් මිනිසත් බව ලබා ඇති කාලය වේ. එලඹෙන වර්ෂයට පා තැබුණ මොහොතේ කළයුතු වන්නේ අප නිරතුරු අප දිවිය පිවිතුරු කරන ඉහත කරණු හතරට අපගේ අවධානය යොමු කිරීම තුළින් ඒ සුචරිතවත්බව අප තුළ ක්‍රමයෙන් දියුණු කර ගැනීමය.
දැඩි ලෝභයෙන්, මුසපත් නොවී තම ආහාර වේලෙන් කොටසක් හෝ සතෙකුට පවා දීමෙන් හෝ දාන චේතනාව දියුණු කළ හැකිය. දීම අන් අයට හිතවත් පුද්ගලයෙකු කරගන්නේය. පි‍්‍රය පරිවාර සම්පත් ලබන්නෙකු වන්නේය.
පි‍්‍රය මව්පියන් හිතවතුන් ලැබීමට හේතු වන්නේය. දානය හෙවත් පරිත්‍යාගය තිදොරම පිරිසුදු කරන මාහැඟි කුසල කර්මයක් වන්නේය. එබවැනින් මේ වර්ෂය තුළ දානය හැකි තරම් සිදු කර ගැනීමට අධිෂ්ඨාන කළ යුතුය.
අප නිවස තුළ සමගිය සමාදානය ඇතිවන්නේ පි‍්‍රය වචනය තුළිනි. බොරුවෙන් කේලමෙන් පරුෂ, හිස් වචනයෙන් වෙන්වීම තුළින් අපගේ වාචසික සංවරය තුළින් අප අන් අයට පි‍්‍රයශීලි පුද්ගලයෙක් වන්නේය. එ බැවින් පි‍්‍රය වචනය අප දිවිය තුළ වචනයෙ පිරිසුදු බවටත් පරිවාර සම්පත් ලබන්නටත් අප අපගේ විශ්වාස කටයුතු පුද්ගලයෙකු වන්නටත් හේතු වන්නකි. තමාටත් අන් අයටත් අර්ථ පිණිස හැසිරීම අර්ථචර්යාවයි.
කාය දුෂ්චරිතාදී අකුසල කර්මයන්ගෙන් බැහැරව අර්ථ පිණිස, තමන්ටත් අන් අයටත් යහපත පිණිස කටයුතු කිරීම වනාහී මහා කල්‍යණ ගුණැතියන් විසින් සිදු කරන්නෙකි.
සැමගේ දියුණුවට අර්ථයෙන් අනුශාසන කරමින් පරහිතකාමීව තද මසුරු අය ත්‍යාගශීලින් කරවීම,නොහික්වුණු පුද්ගලයා හික්මවාලීම ආදී වශයෙන් අවිචාරී පුද්ගලයා සදාචාර සම්පන්න කිරීම ධර්ම දේශනා කරවීම, ධර්ම සාකච්ඡා කිරීම, උපදේශන පැවැත්වීම ආදි තුළින් අපට අර්ථය පිණිස කටයුතු කළ හැකි වේ. තථාගත බුදුපියාණන් වහන්සේ සෑම බුදු ගුණයන් තුළින්ම අර්ථය පිණිස කටයුතු කර ඇති ආකාරය සිතා බලා ඒ සම්බුදු සිරිත ආදර්ශයට ගන්න.
මේ නව වසර තුළ සතර සංග්‍රහ වස්තුවෙන් සියලු ලෝ වැසියන් සම මෙත් සිතින් කටයුතු කිරීමට ශක්තිය ලැබේවා!